അരിയും തിന്ന് ആശാരിച്ചിയെയും കടിച്ച് .....

അഗ്നിപര്‍വതങ്ങുളുടെ ആവിര്‍ഭാവ ലക്ഷ്യം തന്നെ പുകഞ്ഞുകൊണ്ടിരിക്കുക, എന്നിട്ട്‌ സമ്മര്‍ദം കൂടുമ്പോള്‍ പൊട്ടിത്തെറിക്കുക എന്നതാണ്. ചുടും ഗന്ധകവും നിറഞ്ഞ ലാവ പുറത്തേക്കു ഒഴുകി കഴിഞ്ഞാല്‍ കുറച്ചു കാലത്തേയ്ക്ക് പുറമേ ശാന്തത. Houston Knanaya Community ഇപ്പോള്‍ ഈ അവസ്ഥയിലാണ്. ഒരു പള്ളിയുടെ പിറവി. അതെതുടര്‍ന്നുള്ള സമ്മേളനപരമ്പരകള്‍. ഒരിടത്ത്‌ തേങ്ങ പൊട്ടിച്ചാല്‍ മറ്റൊരിടത്ത് ചിരട്ട, അല്ല തെങ്ങ് തന്നെ പൊട്ടിക്കും എന്ന അവസ്ഥയിലാണ് കാര്യങ്ങള്‍. ഏറ്റവും ഒടുവിലത്തെ സെപ്റ്റംബര്‍ 22നു Fuquwa St. Mary’s പള്ളിയില്‍ നടന്ന വിശദികരണയോഗമാണ്. ഈ സമൂഹമൊന്നാകെ സംശയത്തിന്റെ മുള്‍മുനയില്‍ നിര്‍ത്തിയവരുടെ മധുരംപൊതിഞ്ഞ കുമ്പസാരം. തെറ്റുകള്‍  യാതൊന്നുമില്ലാത്തതിനാല്‍ പുരോഹിതന്‍ പ്രായശ്ചിത്തം കല്പിക്കേണ്ടതില്ല. സത്യങ്ങള്‍ എന്നപേരില്‍ നിശബ്ധമായി 'അ' കൂടിച്ചേര്‍ത്ത് അസത്യങ്ങളുടെ പെരുമഴക്കാലം .

പ്രായം ഏറെയുള്ള മുന്‍അധ്യാപകന്റെ “ചക്ക്” എന്ന ചോദ്യത്തിന്നു വൈദികന്റെ “കൊക്ക്” എന്ന മറുപടി. കണ്ണീരും ഗദ്ഗദവും വികാരവേശവും നിറഞ്ഞ  melodramaകള്‍. മുള്ളാന്‍കൊല്ലി വേലായുധനെ പോലെ കമ്പ്‌ നാട്ടിനിര്‍ത്തി പൊതുജനങ്ങളെ ഒതളങ്ങ മാജിക്ക് കാണിക്കുന്ന ജാലവിദ്യക്കാരന്‍. കുന്നുമ്മേല്‍ ശാന്തയുടെ അടുത്തും വലിയതമ്പുരാന്റെ അടുത്തും യഥേഷ്ടം കേറിയിറങ്ങി നെടുനീളന്‍ ഡയലോഗ് തട്ടിവിടാന്‍ വേലായുധനു മാത്രം അധികാരം. ഏതാണ്ടു രണ്ടു മണിക്കൂര്‍സമയം നെഞ്ചും വിരിച്ചുനിന്ന് “ചന്തുവിനെ തോല്പിക്കാനാവില്ല മക്കളെ” എന്ന് ഉറക്കെ പറഞ്ഞതിന്റെ രഹസ്യം ചന്തുവിനിപ്പോള്‍ എല്ലാ വിഷയത്തിനും tuition ഉണ്ടെന്നുള്ള അഹങ്കാരം.

ഇവിടത്തെ പ്രശ്നങ്ങള്‍ എവിടെ തുടങ്ങി എന്നോ ഇതു എങ്ങനെ അവസാനിപ്പിക്കാം എന്നൊന്നും ഇല്ല. സോറി, കഥയില്‍ ചോദ്യങ്ങള്‍ ഇല്ല, ഞാന്‍പിടിച്ച മുയലിന്നു മൂന്ന്‌ കൊമ്പ്. സമ്മിശ്രവികാരങ്ങള്‍ നിറഞ്ഞാടിയ ഒരു Reality Show. പ്രിയവായനക്കാരെ, ഒരു പരമ്പരക്കുള്ള Scope ഞങ്ങള്‍ ഇവിടെ കാണുന്നു. Official Recordingന്റെ കോപ്പി ആരോട്‌ ചോദിച്ചാല്‍ കിട്ടും എന്നറിയില്ല, എങ്കിലും സദ്ദുദ്ദേശ്യം ഉള്ള ആരെങ്കിലും അതൊന്നു കൈക്കലാക്കി ഒരു പരമ്പര എഴുതിയാല്‍ മാലോകര്‍ക്ക് കൂടി ഒന്ന്‌ കേള്‍ക്കാമായിരുന്നു. Mega Serial-ല്‍ താല്പര്യം ഇല്ലെങ്കില്‍ പല സംവിധായകരുടെ സിനിമ കൂട്ടിയോജിപ്പിക്കുന്നത്‌ പോലെ നിങ്ങളുടെ്‌ Version മാത്രം തരിക. ഒരറിവും ചെറുതല്ല. നിങ്ങളുടെ ഓരോ ചെറിയ സൃഷ്ടിയും ക്‌നാനായ സമൂഹത്തിനു വിജ്ഞാനം എകുവാന്‍ ഇടയാകട്ടെ

ക്ഷമിക്കണം, മേല്‍പറഞ്ഞവ പലതും ഹൂസ്റ്റന്‍കാര്‍ക്ക് മാത്രമാകും മനസ്സിലാവുക എന്നാല്‍ പരമ്പര എഴുതുന്നവര്‍  എല്ലാവര്ക്കും മനസ്സിലാക്കാന്‍  പറ്റുംവിധം എഴുതുവാന്‍ ശ്രമിക്കും എന്ന് കരുതുന്നു.

ഹൂസ്റ്റണ്‍കാരന്‍ 

സത്യം ക്രൂശിക്കപ്പെടുമ്പോള്‍

നസ്രത്തില്‍ ജനിച്ച യേശുക്രിസ്തുവിനെ ജൂതന്മാരും റോമാക്കാരും കൂടി കുരിശിലേറ്റി; ഒരിക്കല്‍ മാത്രം.

യേശു മുറുകെപ്പിടിച്ചിരുന്ന രണ്ടു കാര്യങ്ങളുണ്ട് – സത്യവും സ്നേഹവും.

സഭ ഇന്നും സ്നേഹത്തെ മുറുകെപ്പിടിക്കുന്നു. സഹജീവികളോടുള്ള സ്നേഹമല്ല; മാമോനോടുള്ള സ്നേഹം, സമ്പത്തിനോടുള്ള ആര്‍ത്തി. അത്യാഡംബരത്തോടുള്ള അമിതപ്രിയം.

സത്യത്തിന്റെ കാര്യമാണ് കൂടുതല്‍ കഷ്ടം. അത് നിത്യമെന്നോണം ക്രൂശിക്കപ്പെടുകയാണ്.

*    *    *    *

കുമരകം സ്വദേശി, ഒറവണക്കുളം കുടുംബാംഗം, ഉതുപ്പ്‌സാര്‍ നിര്യാതനായി. ഈ മരണത്തോടെ മറ്റൊരു സത്യം കുഴിച്ചുമൂടപ്പെടുകയാണ്. ക്നാനായ സമുദായത്തെ സംബന്ധിച്ചിടത്തോളം വളരെ പ്രധാനപ്പെട്ട ഒരദ്ധ്യായം.

ബിജു ഉതുപ്പ് എന്ന ചെറുപ്പക്കാരന്റെ വിവാഹവുമായി ബന്ധപ്പെട്ടു കേരളത്തില്‍ നിയമയുദ്ധം നടക്കുമ്പോള്‍ ഈയുള്ളവന്‍ ലിബിയന്‍ തലസ്ഥാനമായ ട്രിപോളിയിലാണ്. ഇന്ത്യാടുഡേയുടെ താളുകളില്‍ നിന്നാണ് ഇങ്ങനെ ഒരു കേസിനെക്കുറിച്ച് അറിയുന്നത്. അതുകഴിഞ്ഞ് നാട്ടില്‍ ചെന്നാപ്പോഴൊക്കെ വിശദവിവരം അറിയാന്‍ ശ്രമിച്ചു. പത്തു പേരോട് ചോദിച്ചാല്‍ ഇരുപതു ഭാഷ്യം കിട്ടും – അതായിരുന്നു സ്ഥിതി. എത്ര പെട്ടെന്നാണ് സത്യം ക്രൂശിക്കപ്പെടുന്നത്!

ഏതാണ്ട് നാല് വര്ഷം മുമ്പ് ഉതുപ്പ്സാറിനെ നേരില്‍ കണ്ടു. വിശദമായി സംസാരിച്ചു. സംഭവിച്ചത് എന്താണെന്ന് ഏതാണ്ട് മനസിലായി.

ഉതുപ്പ്സാറിന്റെ ഭാര്യയുടെ മാതാപിതാക്കളില്‍ ഒരാള്‍ മാത്രമായിരുന്നു ക്നാനായ സമുദായാംഗം. വിവാഹാലോചന വന്നപ്പോള്‍ താന്‍ പുറത്താക്കപ്പെടുമെന്നു സാര്‍ ഭയന്നു. അതൊന്നും സാരമില്ല, കുമരകം ഇടവകയില്‍ തന്നെ തുടരാം എന്ന് “അത്യുന്നതങ്ങളില്‍ നിന്ന്” വാക്കാല്‍ ഉറപ്പു ലഭിച്ചതിനെതുടര്‍ന്ന് വിവാഹം നടന്നു. അതിനുശേഷം ഏതോ ആഫ്രിക്കന്‍ രാജ്യത്ത് അധ്യാപകജോലി ചെയ്ത്, നാട്ടില്‍ തിരിച്ചെത്തി. കുടുംബം ക്നാനായ സമുദായത്തില്‍ തന്നെ തുടര്‍ന്നു. ചില മക്കളുടെ വിവാഹവും നടന്നു. എല്ലാം ഭദ്രം.

ബിജു എന്ന മകന്റെ വിവാഹം ആയപ്പോള്‍ എവിടെനിന്നോ പരാതി ഉയര്‍ന്നു. വിശദീകരണം ആവശ്യപ്പെട്ടപ്പോള്‍ ഉതുപ്പ്സാര്‍ സത്യം എഴുതിക്കൊടുത്തു. തീരുമാനം ഉണ്ടായി – ക്നാനായ പള്ളിയില്‍ വച്ച് വിവാഹം നടത്താന്‍ സാധ്യമല്ല; കാരണം ബിജു ക്നാനായ സമുദായാംഗം അല്ല. അവിടംകൊണ്ട് തീര്‍ന്നില്ല. ബിജുവിന്റെ സഹോദരിമാരെ വിവാഹം കഴിച്ചവരും സമുദായത്തിന് പുറത്ത്! അവര്‍ തന്റെ ഭാര്യമാര്‍ ക്നാനായ സമുദായാംഗങ്ങള്‍ ആണെന്ന ഉറപ്പില്‍, ക്നാനായപള്ളിയില്‍ നിന്ന് ലഭിച്ച കുറിയുടെ ബലത്തിലാണ് വിവാഹം കഴിച്ചത്. ആ വാദത്തിനൊന്നും സഭാധികൃതര്‍ പുല്ലുവില പോലും കല്പ്പിച്ചില്ല.

ആ കുടുംബം നിയമയുദ്ധത്തിന് മുതിരുന്നു. ഇന്നത്തെപോലെ ഇലക്ട്രോണിക് മാധ്യമങ്ങളോ, ഫേസ്ബുക്കോ ഇല്ലാത്ത കാലം. എന്നിട്ടും യുദ്ധത്തില്‍ ഒറവണക്കുളം കുടുംബം ജയിച്ചുവത്രേ.

ക്നാനായപള്ളിയില്‍ വച്ച് വിവാഹം നടത്തികൊടുക്കാന്‍ കോടതി കല്‍പ്പിച്ചു. ആ ഉത്തരവിനെയും സഭ അവഗണിച്ചു. രൂപതാമേലധ്യക്ഷനെ കോടതിയലക്ഷ്യത്തിന് അറസ്റ്റ്‌ചെയ്യുമെന്ന ഘട്ടം വരെ കാര്യങ്ങള്‍ എത്തി. ഇടവകകളില്‍ ജാഗ്രതാസമതികള്‍ രൂപീകരിച്ചു (അതെ, ഈയടുത്ത കാലത്ത് മൂപ്പന്മാരുടെ സമതി ആ ജാഗ്രതാസമതിയുടെ പ്രേതത്തെ കാട്ടിയാണ് വിമതരെ പേടിപ്പിക്കാന്‍ ശ്രമിച്ചത്!). ഒപ്പം ആ കുടുംബാംഗങ്ങളെ ഭയപ്പെടുത്തി. വീട്ടിന് കല്ലേറ് വരെ ഉണ്ടായി എന്ന് കേള്‍ക്കുന്നു. ജീവന് വരെ അപായം ഉണ്ടായേക്കാം എന്ന സ്ഥിതിയില്‍ എത്തിയപ്പോള്‍ അവര്‍ പിന്‍വലിഞ്ഞു. വിവാഹം മറ്റൊരു പള്ളിയില്‍ വച്ച് നടന്നു. നിയമയുദ്ധത്തിനു പൂര്‍ണ്ണവിരാമം ആയിട്ടില്ല. എങ്കിലും വിശ്വാസികളുടെ മുമ്പില്‍, അത്യാവശ്യം നുണകളുടെ സഹായത്തോടെ, സഭ മുഖം മിനുക്കി.

ഇതിന്റെ വിസ്താരത്തിന്റെ ഇടയില്‍ “യേശു ക്രിസ്തു പറഞ്ഞിരിക്കുന്നതെല്ലാം നിയമമല്ല” എന്ന കുപ്രസിദ്ധമായ ഒരു മറുപടി ഉത്തരവാദിത്വപ്പെട്ട ആളില്‍ നിന്നും ഉണ്ടായി എന്നും കേള്‍ക്കാന്‍ ഇടയായി.

ഇന്ന് ഉതുപ്പ്സാര്‍ ഓര്‍മ്മയായി. ഇനി, താമസിയാതെ നുണയുടെ ഘോഷയാത്ര പ്രതീക്ഷിക്കാം.

ക്നാനായ സമുദായത്തിന്റെ സ്വവംശവിവാഹനിഷ്ഠ ഇന്ത്യയിലെ ജാതിവ്യവസ്ഥയുടെ ബാക്കിപത്രമാണെന്നും, അനാചാരമാണെന്നും, നിന്നനില്‍പ്പില്‍ മലക്കംമറഞ്ഞ് പറഞ്ഞുനടക്കുന്നവര്‍ ഒരിക്കലും മാനസികമായി പീഡിപ്പിക്കപ്പെട്ട ഉതുപ്പ് സാറിനോടോ, ആ കുടുംബത്തോടോ ക്ഷമ ചോദിച്ചിട്ടില്ല. മാപ്പ് പറയുക എന്നതൊക്കെ മാര്‍പാപ്പ തുടങ്ങിയ നിസാരന്മാര്‍ക്ക് പറഞ്ഞിട്ടുള്ളതാണ്. വൈദികര്‍, മെത്രാന്മാര്‍ തുടങ്ങിയ വലിയവരുടെ അന്തസിന് ചേര്‍ന്നതാണോ മാപ്പ്പറച്ചില്‍?

ഇനിയിപ്പോള്‍ സൌകര്യമായി. എന്തുവേണമെങ്കിലും പറയാം. പുതിയ ചരിത്രം എഴുതാം.

സത്യം പറയണം, പക്ഷേ മറ്റുള്ളവര്‍ക്ക് പ്രിയകരമായ സത്യമേ പറയാവൂ (“സത്യം ബ്രൂയാല്‍ പ്രിയം ബ്രൂയാല്‍, നബ്രൂയാല്‍ സത്യമപ്രിയം”) എന്ന് കേട്ടിട്ടുണ്ട്. പ്രിയമുള്ള നുണകള്‍ പറയാം എന്നു ആരാണോ പറഞ്ഞിട്ടുള്ളത്?

ഉതുപ്പ്സാറിന്റെ ആത്മാവിനു നിത്യശാന്തി നേരുന്നു.

അലക്സ്‌ കണിയാംപറമ്പില്‍ 

കാരിത്താസ്‌ മെഡിക്കല്കോളേജിനൊരു ചരമഗീതം....

കാരിത്താസ്‌ ആശുപത്രി ആരംഭിക്കുന്നത് 1962 മെയ്‌ മാസം ഇരുപത്തൊന്‍പതാം തിയതിയാണ്. നീണ്ട അന്‍പത്തിയൊന്നു വര്‍ഷങ്ങള്‍ പിന്നിട്ടു. സഭാരേഖകളും പ്രസിദ്ധീകരണങ്ങളും ഈ സ്ഥാപനം സമുദായത്തിന്റെ അഭിമാനമാണ് എന്ന് കൊട്ടിഘോഷിക്കുന്നുണ്ടെങ്കിലും ശരാശരി ക്നാനായക്കാരന് ഈ ആശുപത്രിയുടെ കാര്യത്തില്‍ വലിയ അഭിമാനം ഒന്നും ഉള്ളതായി തോന്നുന്നില്ല. ജര്‍മ്മന്‍ സംഘടനകളുടെ  ഔദാര്യമോ, നാട്ടിലും വിദേശത്തുമുള്ള സമുദായാംഗങ്ങളില്‍ നിന്ന് കാലാകാലങ്ങളില്‍ കിട്ടിയ സംഭാവനയോ ഇല്ലാതെയാരംഭിച്ച, കാരിത്താസിന്റെ മൂക്കിനു താഴെയുള്ള, മാതാ ഹോസ്പിറ്റലില്‍ നിന്ന് ലഭിക്കുന്ന സേവനത്തില്‍  കൂടുതലെന്തെങ്കിലും ആ പാവത്തിന് കാരിത്താസില്‍ നിന്ന് ലഭിക്കുന്നു എന്ന് വിചാരിക്കാന്‍ കാരണമൊന്നും ഇല്ല. ളോഹയുടെ പിന്‍ബലം ഇല്ലായിരുന്നുവെങ്കില്‍ ഒരു വാര്‍ഡ്‌ബോയിയുടെ ജോലിപോലും കിട്ടാന്‍ യോഗ്യതയില്ലാത്ത, അഹങ്കാരം മാത്രം കൈമുതലായുള്ള ചിലര്‍ അതിന്റെ സാരഥ്യം വഹിച്ച് അതിനെ അര നൂറ്റാണ്ടുകാലംകൊണ്ട് ഒരു മാതിരി കുട്ടിചോറാക്കിയിരിക്കുന്നു.

കുറെ കെട്ടിടങ്ങള്‍ കാരിത്താസ്‌ പരിസരത്ത് ഉയര്‍ന്നു വരുന്നുണ്ട്. അതിനെ ദുര്മ്മേദസ് എന്നല്ലാതെ വികസനം എന്ന് വിളിക്കാനാവില്ല. കോട്ടയം അതിരൂപതയുടെ സഭാനേതൃത്വത്തിന്റെ കെടുകാര്യസ്ഥതയുടെ മികച്ച ഉദാഹരണമായാണ് ആ സ്ഥാപനം പരിലസിക്കുന്നത്.

പരാതിയുമായി ചെന്നവരുടെ കഥകള്‍ നിരവധി കേട്ടിട്ടുണ്ട്. “നിങ്ങളോട് ഇങ്ങോട്ട് വരാന്‍ ആരെങ്കിലും ക്ഷണിച്ചോ, നിര്‍ബന്ധിച്ചോ?” “അമേരിക്കയില്‍ നിന്ന് വരുന്നവരുടെ വിചാരം ഇതെല്ലം അവരുടെ സ്വന്തമാണെന്നാണ്” ശ്രദ്ധക്കുറവുമൂലം മരണം വരെ സംഭവിച്ചപ്പോള്‍പോലും ഇത്തരത്തിലുള്ള പ്രതികരണമാണ് ആശുപത്രി അധികൃതരില്‍ നിന്നുമുണ്ടായത്.

എന്നിട്ടും, കാരിത്താസിനു മെഡിക്കല്‍ കോളേജാകാനുള്ള അനുമതി സര്‍ക്കാരില്‍ നിന്നും ലഭിച്ചു എന്നറിഞ്ഞപ്പോള്‍, ഇതെഴുതുന്നയാള്‍ ഉള്‍പ്പടെ പലരും സന്തോഷിച്ചു. തലപ്പത്ത് വൈദ്യശാസ്ത്രം എന്താണെന്ന് അറിയാവുന്ന ഒരു പ്രിന്‍സിപ്പാള്‍ ഉണ്ടാകുമല്ലോ, ആ നിലയ്ക്ക് അല്പം കൂടി പ്രൊഫഷണലിസം ഉണ്ടാകും, ദീര്‍ഘകാലാടിസ്ഥാനത്തില്‍ അത് സമുദായത്തിന് മുതല്‍ക്കൂട്ട് തന്നെ ആയിരിക്കും എന്നൊക്കെ മോഹിച്ചുപോയി. മെഡിക്കല്‍കോളേജ് എന്ന ആശയത്തെ നഖശിഖാന്തം എതിര്‍ത്തവര്‍ വിവരദോഷികളായിരുന്നില്ല. അവര്‍ പറഞ്ഞ കാര്യങ്ങളിലും കഴമ്പ് ഏറെയുണ്ടായിരുന്നു. ഇരുകൂട്ടരും പറഞ്ഞത്, പക്ഷെ ചെവിക്കൊള്ളാന്‍ ആരുമുണ്ടായില്ല. ഇത്രയും സങ്കീര്‍ണമായ, ഇത്രയും മുതല്‍മുടക്കുള്ള ഒരു സ്ഥാപനം തുടങ്ങുന്നതിനെക്കുറിച്ച് ഒരു പ്രൊഫഷണല്‍ പ്രൊജക്റ്റ്‌ റിപ്പോര്‍ട്ട്‌ പോലും നേരാംവണ്ണം ഉണ്ടാക്കിയതായി അറിഞ്ഞിട്ടില്ല.

“മൂലക്കാട്ട് പിതാവ് ഒരു കാര്യം വിചാരിച്ചാല്‍ അത് നടത്തിയിരിക്കും....” ഒരു ക്നാനായ വൈദികന്റെ വാക്കുകളാണ്. ഈ വാക്കുകളില്‍ നിറഞ്ഞുതുളുമ്പുന്നത് കറകളഞ്ഞ അഹങ്കാരമാണ്, ധാര്‍ഷ്ട്യമാണ്, അതിനേക്കാള്‍ മാറിവരുന്ന സാഹചര്യം മനസിലാക്കാനുള്ള കഴിവുകേടാണ്.

ഇന്ത്യന്‍ രൂപയുടെ വില എത്രകണ്ടിടിഞ്ഞാലും, 230 കോടി രൂപ എന്നത്, നമ്മുടെപോലുള്ള ഒരു ചെറിയ സമുദായത്തെ സംബന്ധിച്ചിടത്തോളം വളരെ വലിയ തുകയാണ്. ആ തുക, പകരമൊന്നും നല്‍കാതെ, ഭിത്തിയേല്‍ പേരെഴുതി വയ്ക്കാമെന്നും, ഉപദേശകസമിതിയില്‍ (Directors’ Bord-ല്‍ അല്ല) ഉള്‍പ്പെടുത്തി, വര്‍ഷത്തിലൊരിക്കല്‍ ചായയും ഉഴുന്നുവടയും നല്‍കാമെന്നു പറഞ്ഞാല്‍ അത്രയും തുക സംഭരിക്കാനാകും എന്ന് ചിലര്‍ക്ക് തോന്നിയെങ്കില്‍, അവരെ അവഹേളിക്കാന്‍ ശത്രുക്കള്‍ ആരും വേണ്ടതില്ല, അവര്‍ അവരെ സ്വയം അവഹേളിക്കുകയാണ്.

നമ്മുടെ സഭാനേതൃത്വത്തിന് വളരെ ലളിതമായ, ഒരു കാര്യം മനസിലാകുന്നില്ല. ജന്തുലോകത്തില്‍ പുരോഹിതനെ ചുമക്കേണ്ട ബാധ്യതയുള്ള ഏക ജീവി (ചെറിയ തോതില്‍ തേനീച്ചകള്‍ക്കും ആ ഗതികേടുണ്ട്) മനുഷ്യനാണ്. എന്നിരുന്നാലും, പുരോഹിതന്‍ എന്ന വര്‍ഗം  ഇല്ലെങ്കിലും അല്മായന്‍ ഉണ്ടെന്നും, പക്ഷെ വിശ്വാസി ഇല്ലെങ്കില്‍ പുരോഹിതന്‍ ഇല്ലെന്നുമുള്ള ലോജിക്കാണ് അവര്‍ക്ക് ഇനിയും പിടി കിട്ടാതെ പോകുന്നത്.

കുറെ ഭീകരപ്രവര്‍ത്തകരെ വെള്ളകുപ്പായവും ഇടീച്ച് ലോകത്തിന്റെ പല ഭാഗത്തേയ്ക്കും വിട്ട്, അവരുടെ കൈയില്‍ നിന്ന് കപ്പം വാങ്ങി, ആര്‍ഭാടമായി ജീവിക്കുകയെന്നതാണ് സഭാസേവനം എന്ന് ധരിക്കുന്നവര്‍ക്ക് ഇതൊന്നും മനസിലാകുകയില്ല. കത്തോലിക്കാസഭയുടെ തലവന്‍ പുരോഹിതവര്‍ഗ്ഗത്തിന്റെ സകല കൊള്ളരുതായ്മകളുടെയും ന്യായീകരണമായി പറയപ്പെടുന്ന ചട്ടക്കൂടുകള്‍ ഭേദിച്ച് നന്മ പ്രവര്‍ത്തിക്കുന്നു. അതിവര്‍ കാണുന്നില്ല; ജനം ഇവരെ പഴിക്കുന്നു, വെറുക്കുന്നു. അതും ഇവര്‍ അറിയുന്നില്ല.

വിവരമില്ലാതെ, നാണമില്ലാതെ, സമുദായത്തെ ഇവര്‍ നാശത്തിലേയ്ക്ക് നയിക്കുന്നു. പ്രതികരണശേഷി ഇല്ലാത്തവരും, എന്തുകണ്ടാലും ഹോശാന പാടാന്‍ തയ്യാറായി നില്‍ക്കുന്ന ഒരു പറ്റം സ്തുതിപാഠകരും നാശത്തിലേയ്ക്കുള്ള സമുദായത്തിന്റെ കൂപ്പുകുത്തലിന്റെ വേഗത കൂട്ടുന്നു.

ഇല്ല, അതു പൂര്‍ണ്ണമായുംസംഭവിക്കുന്നതിനു മുമ്പ് സമുദായത്തിന്റെ രക്ഷകന്‍ എവിടെ നിന്നെങ്കിലും അവതരിക്കും. ആരൊക്കെ കൈയൊഴിഞ്ഞാലും ക്നാനായസമുദായത്തെ ദൈവം കൈയൊഴിയുകയില്ല.

ആ രക്ഷകനായി നമുക്ക് കാത്തിരിക്കാം.

അലക്സ്‌ കണിയാംപറമ്പില്‍

കാരിത്താസ് മെഡിക്കല്‍ കോളേജ് ചവറുകൊട്ടയിലേക്ക്

കാരിത്താസില്‍ ഒരു മെഡിക്കല്‍ കോളേജ് തുടങ്ങണമെന്ന് വര്‍ഷങ്ങള്‍ക്ക് മുന്‍പ് കൊടുത്ത അപേക്ഷ അനുവദിച്ചുകിട്ടിയത് 2012 അവസാനമാണ്. അനുവദിച്ച മെഡിക്കല്‍ കോളേജിന്റെ സാദ്ധ്യതകളും പരിമിതികളും മനസിലാക്കിയ കോട്ടയം അതിരൂപതയിലെ വൈദികരും, തലയില്‍ ആള്‍താമസം ഉള്ള മറ്റുചിലരും മെഡിക്കല്‍ കോളേജ് നമുക്ക് ബാദ്ധ്യത ആകുമെന്നും അതുമായി മുന്നോട്ട് പോകുന്നത് മഠയത്തരമാകുമെന്നും ആദ്യമേ പറഞ്ഞിരുന്നു. പാസ്റ്ററല്‍ കൗണ്‍സിലിലും പ്രസ്ബിറ്ററല്‍ കൗണ്‍സിലിലും വൈദികസെനറ്റിലും വിഷയം ചര്‍ച്ചയ്ക്കുവന്നപ്പോള്‍ അരുതേയെന്ന് അതിരൂപതാ നേതൃത്വത്തെ അറിയിച്ചിരുന്നതാണ്. ഇതൊന്നും ചെവിക്കൊള്ളാതെ ഞാന്‍ തീരുമാനിച്ചാല്‍ അത് നടപ്പിലാക്കിയിരിക്കും എന്ന മിഥ്യാധാരണയില്‍ അജഗണങ്ങളുടെ മനസറിയാതെ നീങ്ങിയതിന്റെ ഫലമായി മെഡിക്കല്‍ കോളേജിനു വെച്ച വെള്ളം വാങ്ങിവെയ്‌ക്കേണ്ട നാണക്കേടിലായിരിക്കുകയാണ് കോട്ടയം അതിരൂപതാനേതൃത്വം.

പിരിവു തരുവാന്‍ സമുദായക്കാരും അതു കൈകാര്യം ചെയ്യാന്‍ മറ്റേതാനുംപേരും എന്ന കീഴ്‌വഴക്കം പഴങ്കഥയായി എന്ന് ഇനിയെങ്കിലും മനസിലാക്കിയാല്‍ നന്നായിരുന്നു. അതിരൂപതയിലെ ഇന്നത്തെ നേതൃത്വം അധികാരം ഏറ്റിട്ട് പുതുതായി ഒരു പരിപാടിയും നടപ്പിലാക്കിയിട്ടില്ല, നടപ്പിലാകാന്‍ ആഞ്ഞതെല്ലാം തലകീഴായി മറിഞ്ഞെന്ന ആക്ഷേപത്തെ മറികടക്കാനാണ് കാരിത്താസ് മെഡിക്കല്‍ കോളേജിലൂടെ ലക്ഷ്യമിട്ടത്. ശതാബ്ദിയോടനുബന്ധിച്ചു പ്രഖ്യാപിച്ച സ്‌നേഹവീടുപദ്ധതിയും വിദ്യാഭ്യാസവായ്പാ നിധിയും പരാജയപ്പെട്ടിടത്തു നിന്നാണ് നേരെ മെഡിക്കല്‍ കോളേജിലേക്ക് വന്നത്.

    

കോളേജിന്റെ സാദ്ധ്യതാപഠനത്തിനും പ്രചരണത്തിനും മറ്റുമായി അരക്കോടിയോളം രൂപ ഇതുവരെ ചിലവാക്കിയതായി അറിയുന്നു. അരമനയിലെ തന്റെ സഹപ്രവര്‍ത്തകരുടെയെങ്കിലും ഉപദേശം സ്വീകരിച്ചിരുന്നെങ്കില്‍ ഇത്രയും തുക നഷ്ടമാകില്ലായിരുന്നു. മെഡിക്കല്‍ കോളേജ് തുടങ്ങരുതെന്ന് അധികാരികളെ ഉണര്‍ത്തിക്കാന്‍ ക്‌നാനായ ഫെലോഷിപ്പ് രണ്ടു തവണയായി ലഘുലേഖ പുറത്തിറക്കി പ്രചരണം നടത്തിയതിന് ഇരുപതിനായിരം രൂപയോളം ചിലവഴിച്ചു എന്നും ഓര്‍ത്തുപോകുന്നു.

അനുഭവത്തില്‍ നിന്നും പാഠം ഉള്‍ക്കൊണ്ടുകൊണ്ട് സഹവൈദികരുടെയും സമുദായക്കാരുടെയും മനസറിഞ്ഞ് സ്‌നേഹത്തോടെ സംസാരിച്ചും ചര്‍ച്ചചെയ്തും  ഏകമനസോടെ മുന്നോട്ടു പോകുവാന്‍ ഇനിയും സമയം ഉണ്ട്. മെഡിക്കല്‍ കോളേജ് വേണ്ടെന്നുവെച്ച സ്ഥിതിക്ക് മലബാറില്‍ ഒരു ആശുപത്രി തുടങ്ങി അവിടുത്തെ സഹോദരങ്ങളുടെ പ്രയാസങ്ങള്‍ മാറ്റിക്കൊടുക്കാന്‍ തയ്യാറാകണമെന്ന് ഞങ്ങള്‍ അഭ്യര്‍ദ്ധിക്കുകയാണ്.

   

തീരുമാനങ്ങള്‍ എല്ലാം എടുത്തശേഷം നാടുമുഴുവന്‍ ഇളക്കി അഭിപ്രായവും സംഭാവനയും ആരാഞ്ഞ അതിരൂപതാനേതൃത്വം ജൂലൈ അവസാനം മെഡിക്കല്‍ കോളേജിന്റെ പ്രഖ്യാപനം നടത്തുമെന്നാണ് പറഞ്ഞിരുന്നത്. ഒരു മാസത്തിനു ശേഷം ഇക്കഴിഞ്ഞ ആറാം തീയതി മലയാള മനോരമ ലേഖകനിലൂടെയാണ് കോളേജ് വേണ്ടെന്നുവെച്ച വാര്‍ത്ത പുറത്തുവന്നത്. കാരിത്താസ് മെഡിക്കല്‍ കോളേജ് തുടങ്ങുന്നില്ല എന്ന വിവരം ധൈര്യപൂര്‍വ്വം പത്രക്കുറുപ്പിലൂടെയെങ്കിലും ഔദ്യോഗികമായി പ്രഖ്യാപിക്കാതിരുന്നതില്‍ നിന്നും അല്പം കുറ്റബോധം ഉണ്ടെന്ന് കരുതാം അത്രയ്ക്കും ആശ്വാസം. നന്മയുടെ ഇത്തിരിവെട്ടം അവശേഷിക്കുന്നുണ്ട്.

  

ഇന്നത്തെ നായകന്മാരില്‍ നിന്നും സമൂദായം കൂടുതലൊന്നും പ്രതീക്ഷിക്കുന്നില്ല. നിലവിലുള്ള സ്ഥാപനങ്ങളും, തനിമയും ഒരുമയും നിലനിര്‍ത്തയാല്‍ മതിയാകും. ശത്രുക്കളില്‍ നിന്നും സമുദായത്തെ കാത്തുകൊണ്ടാല്‍ വലിയ സന്തോഷം. ഇപ്പോള്‍ കൂടുതല്‍ പ്രതീക്ഷിക്കുന്നത് അവിവേകമാണെന്നു സമുദായം തിരിച്ചറിഞ്ഞുകഴിഞ്ഞു.

ഡോമിനിക്ക് സാവിയോ വാച്ചാച്ചിറയില്‍

പ്രസിഡന്റ്‌ ക്‌നാനായ ഫെലോഷിപ്പ്

ഫോണ്‍ - 944 614 0026

Knanaya History: Interview with Fr. Jose Chazikattu