അനുസരണാവ്രതം –സ്റ്റീഫന്‍ തോട്ടനാനി

നമ്മുടെ വൈദികർ അമേരിക്കയിലെ തങ്ങളുടെ സ്വന്തം സമൂഹാംഗങ്ങളോട് അരുതാത്തത് ചെയ്ത് നമ്മുടെ ഒരുമയും സന്തോഷവും നഷ്ട്ടപ്പെടുത്തികൊണ്ടിരുന്നപ്പോൾ പറഞ്ഞിരുന്ന കാര്യമായിരുന്നു 'മേലധികാരികൾ പറയുന്നത് അനുസരിക്കാൻ ഞങ്ങൾ ബാധ്യസ്ഥരാണ്, അനുസരണ എന്നത് വൈദികാന്തസ്സു സ്വീകരിക്കുമ്പോൾ എടുക്കുന്ന വൃതങ്ങളിൽ പെട്ടതാണ്' എന്ന്.  പൌരോഹിത്യവൃതങ്ങളിൽ പെട്ട 'ദാരിദ്ര്യത്തെ' പറ്റി ഒന്നും പറഞ്ഞു കേൾക്കാറില്ലെങ്കിലും, അനുസരണയുടെ മറവിൽ പൊറുക്കാനാവാത്ത തെറ്റുകൾ ചെയ്തിട്ട് തങ്ങളുടെ നിസ്സഹായാവസ്ഥയും ഖേദവും പ്രകടിപ്പിക്കുന്നതിലെ അനൌചിത്യം ജനങ്ങൾക്ക് നന്നായറിയാം.

ഇപ്പോൾ ഫ്രാൻസിസ് മാർപ്പാപ്പ ഒളിച്ചുകളികളൊന്നും ഇല്ലാതെ വളരെ വ്യക്തമായി വൈദികരോടും മേലധികാരികളോടും സഭ്യ്ക്കുള്ളിലെ ആഡംബരങ്ങൾ ഒഴിവാക്കുവാനും, ചെലവ് ചുരുക്കുവാനും, ഭൌതിക സമ്പത്തിൽ താല്പര്യം കാണിക്കാതെ ആല്മീയതക്കു ഊന്നൽ കൊടുക്കുവാനും ആഹ്വാനം ചെയ്യുന്നു. മാർപാപ്പ, അദ്ദേഹം പറയുന്നത് സ്വന്തം പ്രവര്ത്തികളിലൂടെതന്നെ മാതൃകയാക്കി കാണിച്ചു കൊടുത്തുകൊണ്ട് സഭയിൽ സംഭവിച്ചുകൊണ്ടിരിക്കുന്ന അംഗത്വശോഷണത്തിൽ നിന്ന് സഭയെ ഉയർത്തുവാൻ കഠിനാധ്വാനം ചെയ്യുന്നു.

അനുസരണാവ്രതത്തിന്റെ മറവിൽ പള്ളികൾ വാങ്ങികൂട്ടി,  സിറോ മലബാർസഭയുടെ സിംഹാസനവും ഭൌതിക സമ്പത്തും സ്വരൂപിച്ചു ഉറപ്പിച്ച്‌, നമ്മുടെ സമൂഹത്തെ വെട്ടിമുറിച്ചു വൃണപ്പെടുത്തിയ നമ്മുടെ വൈദികർ ഇനി എന്താണ് പറയുവാൻ പോകുന്നതെന്ന് വിശ്വാസികൾ ഉറ്റുനോക്കികൊണ്ടിരിക്കുന്നു. അനുസരണാവ്രതത്തെ ഉയർത്തിപിടിക്കുന്ന നമ്മുടെ വൈദികർ അവരുടെ ഏറ്റവും വലിയ മേലധികാരിയായ ഫ്രാൻസിസ് മാർപ്പാപ്പ പറയുന്നതിനെ അനുസരിക്കുമോ? അതോ ഇപ്പോൾ ചെയ്തുകൊണ്ടിരിക്കുന്നതുപോലെ ഏതിനെയും മറികടക്കാനുള്ള അധികാരവും, കരുനീക്കങ്ങളും വാചകകസ്സർത്തുകളുമായി വിശ്വാസികളുടെ മനസ്സിനെ സ്വാധീനിക്കാൻ ശ്രമിച്ചു വീണ്ടും വിഡ്ഢിവേഷം കെട്ടി ചെളിക്കുണ്ടിലേക്ക്‌ തന്നെ ആഴ്ന്നു പോകുമോ?

മാർപ്പാപ്പ തന്റെ പ്രബോധനത്തിലൂടെയും, സ്വന്തം പ്രവര്തിയിലൂടെയും കാണിച്ചുതരുന്ന എളിമയും വിനയവും ദാരിദ്ര്യവും സ്നേഹവും നമ്മുടെ സഭാധികാരികളും ഇനി കാണിക്കുമോ? തങ്ങളുടെ അനുസരണാവ്രതം മാനിച്ചുകൊണ്ട്, പോപ്പിനെ അനുകരിച്ചു ഭൌതികസമ്പത്തിന്റെയും അധികാരത്തിന്റെയും മാസ്മരവലയം ഭേദിച്ച് ഈ അവസരം പ്രയോജനപ്പെടുത്തി പ്രവര്ത്തിക്കുവാനുള്ള മനോധൈര്യം നമ്മുടെ സഭാധികാരികൾക്കു ലഭിക്കുമെന്ന് പ്രത്യാശിക്കാം!

Stephen Thottananiyil